*महाविकास आघाडी सरकारच्या दोन वर्षे काळातील
योजनांची माहिती झळकली लातूर एक्सप्रेसच्या डब्यांवर*
उस्मानाबाद/ प्रतिनिधी
राज्यातील महाविकास आघाडी सरकारने गेल्या दोन वर्षात राज्यात राबविलेल्या योजनांची माहिती भारतीय रेल्वेच्या डब्यांवर झळकली आहे. राज्य सरकारने गेल्या दोन वर्षात घेतलेल्या लोककल्याणकारी योजनांची आणि निर्णयांची माहिती जनतेला व्हावी म्हणून विविध माध्यमांचा वापर करण्यात येत आहे.त्याचाच एक भाग म्हणून माहिती व जनसंपर्क महासंचालनालयाने राज्याच्या विविध भागातून जाणाऱ्या पाच रेल्वे एक्सप्रेस गाडयांची निवड केली आहे.यात लातूर एक्सप्रेसचाही समावेश करण्यात आली आहे. 9 फेब्रुवारी रोजी पहाटे 5.54 वाजता योजनांच्या माहितीने सजलेली लातूर एक्सप्रेस उस्मानाबाद येथून रवाना झाली,तेव्हा अनेक नागरिक रेल्वे डब्यांवरील माहिती स्फूर्तपणे वाचतांना दिसले.
मुख्यमंत्री उध्दव ठाकरे यांच्या नेतृत्वाखाली महाविकास आघाडी सरकारने गेल्या दोन वर्षात राज्यात राबविलेल्या विविध योजनांची माहिती रेल्वे डब्यांवर डकवण्यिात आली आहे. या माहितीसाठी “आपला महाराष्ट्र,आपले सरकार” अशी टॅगलाईन देण्यात आली आहे.शेती,क्रीडा,सामाजिक न्याय,चिंतामुक्त शेतकरी,मोफत सातबारा,आता घरी येणार ई-पीक पाहणी नोंदणी,कोरोना लसीकरण,कोरोना काळातील आरोग्य विषयक कामकाज, नैसर्गिक आपत्तींच्या काळात राज्यसरकारने केलेली मदत, चक्रवादळ ग्रस्थ शेतकऱ्यांना फळबाग लागवडीसाठी केलेली मदत, कोरोन महामारित पालक गमावलेल्यांना बालकांना केलेली मदत,जिथे सारथी तिथे प्रगती,क्षमता आणि कौशल्य वृध्दीसाठी शिक्षण प्रशिक्षण अशा अनेक योजनांची माहिती या रेल्वे डब्यांवर आकर्षकपणे चिटकवली आहे. मराठवाडयातून धावणाऱ्या नंदीग्राम एक्सप्रेस आणि लातूर एक्सप्रेसचा यासाठी वापर करण्यात आली आहे. 1 फेब्रुवारी ते 1 मार्च या दरम्यान रेल्वे डब्यांवर ही माहिती असेल.