*दस्तापूर खून प्रकरणाचा अवघ्या ४८ तासांत छडा आरोपीला अटक*
*धाराशिव स्थानिक गुन्हे शाखेच्या पथकाने केली कारवाई*
*सदर कारवाई ही पोलिसांच्या सतर्कतेचे आणि तांत्रिक कौशल्याचे उदाहरण ठरली आहे.*
धाराशिव/प्रतिनिधी
मुरुम पोलीस ठाणे हद्दीतील दस्तापूर ता. उमरगा येथील हैद्राबाद राष्ट्रीय महामार्गावर एका बोलेरो जीपजवळ सापडलेल्या मृतदेहाने खळबळ उडवली होती. धाराशिव स्थानिक गुन्हे शाखेच्या पथकाने चक्र फिरवत अवघ्या ४८ तासांत खुनाचा गुन्हा उघडकीस करत मुख्य आरोपीला ताब्यात घेतले आहे.
सोमवार (दि. १९ ) रोजी सकाळच्या सुमारास बोलेरो जीप अपघातग्रस्त स्थितीत उभी असल्याची माहिती मिळताच मुरुम पोलीस तातडीने घटनास्थळी दाखल झाले. गाडीच्या शेजारी अन् ओळखी एक व्यक्ती मृतावस्थेत आढळला. मृताची ओळख दाळिंब (ता. उमरगा) येथील शमशुद्दीन मियासाहेब पटेल ( ४५) आशी ओळख पटली.
प्रथमदर्शनी सदर व्यक्तीच्या डोक्यात दगड घालून निर्घृण खून करण्यात आल्याचे स्पष्ट झाले. मात्र गुन्हा कोणी केला, याबाबत कोणतीही ठोस माहिती नव्हती. सततचा पाऊस, वीज पुरवठ्यातील अडथळे आणि परिसरातील सीसीटीव्ही फुटेज अपुरे असल्यामुळे तपासात अडथळे निर्माण झाले. तरीही स्थानिक गुन्हे शाखा आणि मुरुम पोलिसांनी मिळून संपूर्ण परिसर पिंजून काढत तांत्रिक विश्लेषणाच्या आधारे गुन्हा उघडकीस आणण्यात यश मिळवले.
खुनाचा उगम जुन्या वैमनस्यातून झाल्याचे तपासात निष्पन्न झाले असून, दाळिंब येथीलच ज्ञानेश्वर भोळे आणि त्याच्या साथीदाराने मिळून गुन्हा केला. ज्ञानेश्वर भोळेला तुगाव येथे रात्री उशिरा अटक करण्यात आली. चौकशी दरम्यान त्याने गुन्ह्याची कबुली दिली.
सदर कारवाई ही धाराशिव पोलीस अधीक्षक संजय जाधव, अप्पर पोलीस अधीक्षक शफकत आमना उपविभागीय पोलीस अधिकारी सदाशिव शेलार, यांच्या मार्गदर्शनाखाली धाराशिव स्थानिक गुन्हे पोलिस निरीक्षक विनोद इज्जपवार , मुरुड पोलिस ठाण्याचे सहाय्यक पोलिस निरीक्षक संदीप दहीफळे सहाय्यक पोलिस निरीक्षक अमोल मोरे, यांच्या नेतृत्वाखाली धाराशिव स्थानिक गुन्हे शाखेचे पोलीस अंमलदार सचिन खटके, विनोद जानराव, नितीन जाधवर, जावेद काझी, पोलिस नाईक बबन जाधवर दयानंद गादेकर, समाधान वाघमारे, चालक विजय घुगे, सुभाष चौरे यांच्या सह मुरुम पोलीस ठाण्याचा संपूर्ण स्टाफ यांनी संयुक्तरित्या उल्लेखनीय कामगिरी बजावली.